姣佬巧遇基粉客
周末過後，星期一嘅公司永遠都係最冷清，因為大部分「是非精」都仍然未回魂，未有氣力去講是非，辦公室自然清靜好多。我最享受就係呢一日，因為唔使做咁多戲，再加上我上個周末出咗咁大件事，用咗好多精力應付，仲消耗過我一晚大戰四場。可想而知呢件事令我幾煩擾，所以我同自己講，就算肚餓都要暫時休戰，我要清吓腸胃，唔可以食得太雜，唔係遲早出事。
波士一早返嚟見到我就陰陰咀笑，我直覺覺得Macy呢個衰婆已經揚咗件事出嚟，呢一刻我真係想搵窿捐，千年道行一朝喪就係我依家嘅心境。如果有個壯闊嘅肩膀喺我隔籬出現嘅話，我會立即挨落去。點知呢個時候，真係有個壯男送蒸餾水上嚟，佢結實嘅三頭肌、令我目不轉睛嘅寬闊胸膛，仲有身下一條超短牛仔褲，嘩！簡直係晨光第一線。但原來唔止我覺得精彩悅目，就連房入面嘅Richard都忍唔住拉開窗簾(目及)嘢，尤其是嗰條超短牛仔褲，連「股罅」都見到，搞到佢原始獸性乍現。
不過呢度始終係Office，我哋係經過歷練嘅高級職員，唔可以咁失禮，睇還睇，唔會流口水。點知Richard竟然唔爭氣，佢畀自己嘅原始慾望沖昏咗頭腦，竟然行出房，對住件壯男指指點點，仲夠膽死教人點裝，你估人哋係傻仔咩，一望就知你不懷好意，不過見你身光頸靚，電吓你，自己都有着數，於是兩個大男人，就喺我面前上演咗一幕「姣佬巧遇基粉客」……（待續）
Lady Barbara
某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。