人氣甜心黃馥琳

好多小女孩嘅志願係當模特兒，於是長大後千方百計要入行，不過，今日介紹嘅模特兒，佢入行嘅原因竟然係因為同前度男友鬥氣，陰差陽錯下，竟然成為咗北京當紅嘅模特兒，佢就係黃馥琳。

今年22歲嘅馥琳，佢嘅入行經過相當有傳奇性，話說佢男朋友成日上網睇女仔，睇都唔止，仲喺佢面前評頭品足，經常讚呢個女仔點靚，嗰個女仔點好，但從來都冇讚過馥琳一句，於是佢偷偷搵朋友拍咗一輯靚相，並放上網公諸同好，男友睇到後即對馥琳刮目相看。

天分甚高

呢輯相曝光後，不斷有模特兒公司邀請馥琳當模特兒，起初佢只係玩票性質，但後來工作一個接一個，呢個時候，男朋友就呷醋，最後兩人因為鬧意見而分手。馥琳並冇後悔，因為佢從來都唔覺得自己靚，但家陣不斷得到認同，佢反而深感欣慰。

講真，馥琳樣子有氣質，身材勻稱，任何造型扮相都難佢唔到，而佢拍攝性感寫真更係極之吸引，以一個冇受過專業訓練嘅新人嚟講，可以拍得出咁誘人嘅效果，天分認真高，所以唔少網友都讚馥琳係天生食呢行飯嘅！

專心工作

馥琳出道一年左右，由於好多網友幫忙轉貼佢相片，所以人氣大盛，喺北京嘅模特兒界甚有名氣，理應有好多電影製作公司搵佢拍戲，不過，馥琳都好少答應，因為佢認為自己嘅事業仲喺起步階段，故推咗唔少影視演出嘅機會，只想專心做好模特兒嘅工作，難怪成為廣告商同埋攝影師嘅寵兒，工作接完一個又一個啦！家陣大家只要上網，就會睇到馥琳嘅最新照片，相信當馥琳喺模特兒界打穩陣腳之後，一定會同其他人氣模特兒一樣，作多棲發展，大展拳腳。

黃馥琳Profile

出生地：北京　

三圍：33-23-34　

身高：163cm　

興趣：上網、睇戲