唔想破壞規矩

繼上次「佐治古尼」「軟着陸」事件之後，隔咗成個禮拜，Macy個死婆先蒲頭，我都差唔多忘記咗，不過佢一打嚟，就即刻喚起我嘅記憶，立即揶揄佢遇到「軟着陸」都唔出聲。佢聽到之後，好似有啲Shock，因為佢冇諗過我會同佐治古尼有一腿，不過好快佢就平復過嚟：「你個姣婆又幾厲害喎，嗰晚無心裝載都可以勾到佬。」我冇好詳細咁解釋，亦想慳番啲口水，事關我Barbara出嚟溝仔咁多年，有咩未見過呀！收線之後，Richard就出現喺我眼前，問我今晚有冇時間一齊食飯。

睇佢一臉風騷，就知事件已經告一段落，仲大獲全勝添，我餐飯梗係走唔甩啦，一於食咗佢隻車先！我立即打去太子大廈頂樓間餐廳訂位，竟然仲有位喎，真係有口福！收工時分，佢問我訂咗邊度，我就如實報告，佢一啲都唔抗拒，仲讚我夠眼光。佢仲話平時好難訂位，今日竟然畀我訂到，佢一邊講一邊滿面笑容咁對住我。Richard嘅紳士風度，其實真係要加分，抵我幫佢咁搏命攞料。

我哋一邊食、一邊講番之前件事，Richard雖然冇好詳細咁話我知事情嘅來龍去脈，不過我早就已經掌握當中嘅玄機，佢仲要畀我更遲知。Anyway，事情已經畀佢同上層大人物搞掂咗，Richard喺3個月後就會更上一層樓。我聽到之後，忽然間有啲唔開心，因為眼前嘅好老細好快又要走。Richard好似睇穿我心事咁，佢直接問我有冇興趣繼續跟佢，我用咗9秒9就答應咗呢個Offer。之後，全晚佢都用四萬咁嘅笑容對住我，呢餐飯食得好愉快。飯後，佢話車我返屋企，不過我拒絕咗，因為我上親男人車，都唔止返屋企咁簡單，所以我唔想破壞呢個規矩……

（待續）