世界波：偷食有樣睇

近期好多人都唔明白，咩叫感情有缺失，簡單嚟講即係偷食。其實依家男女平等，社會又愈來愈開放，男女都有機會出去偷食，不過男人嘅偷食指數，始終比女人高少少！英國有性調查研究報告指出，較易偷食嘅男人，原來都有某啲共通點，快啲Check吓自己有冇份啦！

英國男人一向以紳士風度見稱，不過喺紳士包裝下，其實佢哋嘅婚外情問題都幾嚴重，所以報告特別挑選咗1,000對已婚男女做訪問，結果發現曾經發生婚外情嘅男人有55%，而呢55%男人當中，都有以下幾種共同嘅特質：

1.有錢身痕

隨住社會愈來愈發達，有錢人都愈來愈多，好似近日香港都有個富二代一個月淨係飲飲食食都使300幾萬，搞到畀老婆索取11億贍養費！所以男人一旦有咁多錢喺身，就自不然會身痕，仲會招惹好多豬朋狗友埋身，結果三五成「行」，一齊去滾。

2.性慾高漲

還記得十幾年前，荷里活有個男明星，話自己患咗「性慾狂」病症，以解釋自己何解不停出去搞婚外情。其實呢個理由真係好牽強，呢啲所謂性慾強嘅男人，好多時都被性慾沖昏理性，結果婚外情一浪接一浪，沒完沒了。

3.隔籬飯香

對女人嚟講，呢個係好殘酷又現實嘅出軌理由。因為大部分男人，都存有妻不如妾、妾不如偷嘅心態，所以已婚男士出軌嘅刺激感，遠比單身男士一腳踏幾船更高。

4.生活放蕩

俗語話：「近朱者赤，近墨者黑。」一對夫妻如果平常生活放蕩，經常參與換妻遊戲，又或大混戰等色情玩意，性態度自然開放，最終就愈來愈隨便，甚至認為兩夫妻要有各自嘅私人空間，間中出去作樂，先可以令夫妻關係更穩固。

5.以權謀私

有人話一個成功男人嘅背後，一定有女人作後盾。其實計我話，佢背後一定唔止一個女人。事關一個有權力慾嘅男人，同樣喜歡操控女人，而只操控一個女人，絕對唔能夠滿足佢嘅權力慾望。同時，權力亦係吸引女人埋身嘅條件之一，想搞婚外情真係易過借火。

6.優柔寡斷

一個優柔寡斷嘅男人，對任何事都會猶豫不決，面對兩個女人，唔知揀邊個好，結果拖泥帶水，累己累人。呢種性格嘅男人，更會將婚外情搞到一頭煙，最終雙失收場。