世界波：一吻傾心 源自基因

大家有冇諗過，點解通街都係女人，偏偏會選擇身邊呢一個呢？因為對方靚女？因為對方身材好？定係因為佢係女強人、分分鐘可以養埋你呢？專家就話，同伴侶得以結合，可能只係源於一個簡單嘅吻。

拍過拖嘅朋友都知道，向對方展開追求時便有如打仗，兼且要過幾關先可以正式達陣。首先約對方出街為第一關，約到仲要搵機會拖手仔，拖到手仔之後，就要開始部署錫嘴仔，而最後一關當然係上床啦！

初吻定情

科學家Sheril Kirshenbaum就表示，錫嘴仔除咗係上床前嘅重要關口外，仲可以決定埋日後能否發展成為長期伴侶同拉埋天窗！咁又係，若然大家進行初吻嘅時候取得協調，並且順利完成，上床機會自然較高。相反地連初吻都搞到火星撞地球，咁就真係未上床先掃興。不過，Sheril Kirshenbaum指出，一個吻能夠定情，其實同我哋嘅基因都好有關係。

唾液燃情

男女嘴對嘴、脷疊脷，交流嘅除咗係愛意同體溫之外，講得惡心少少，其實仲有口水。兩個打得火熱嘅人激烈濕吻時，背後實在蘊含重大意義，事關男人嘅口水含有睾丸酮素，呢種賀爾蒙對於女性有催情作用，換句話說，男人嘅口水可以算得上係女性嘅燃情劑。

另一方面，口水入面嘅催產素（Oxytocin）仲可以令女性產生入迷嘅感覺，令佢對男方一吻傾心。而且接吻嘅時候，大家都會聞到彼此口水當中嘅基因成分─Major Histocompatibility Complex（MHC），大腦仲會Feel到呢種基因同自己本身嘅基因有幾大分別。專家話彼此基因分別愈大，表示大家結合之後，繁殖嘅下一代就愈健康，因而令大家嘅關係更為良好。相反，基因接近的話，就會覺得唔多啱Feel，可能只係上一次床就會換畫。

親吻進階

睇到呢度，大家係咪覺得原來接吻都有好多竅妙呢，其實就連接吻方法都可以因應不同類型嘅女仔而作出相應改變㗎，就等小弟為大家講解一下啦！

天使之吻

屬於甜蜜又舒服嘅吻法，適合用於任何年齡女性，而方法就係輕力又溫柔咁吻落對方右邊嘅太陽穴位置。

腮吻

適用於第一次約會，方法係雙手輕按住對方肩膀，然後用嘴唇輕吻同輕掃其腮位，除咗可以表達出「我好喜歡你」嘅意思，仲可以挑起對方嘅情慾。

冰極之吻

口含一粒冰，然後同對方濕吻，兩條脷互相交纏嘅時候，同時感到冰極快感，令你愈吻愈纏綿。

頸吻

聽落好簡單，但依然有技巧要注意，事關一般人只會吻對方嘅頸部前方，不過頸背其實同樣敏感，如果先用舌頭撩動幾下，濕潤一番之後再錫，絕對可以令對方爽到打冷震。