世界波：晨早起床肉搏好疏肝

俗語有云：「早睡早起身體好」，朝早陽氣特別充足，

男人如果能夠早起身，除咗對身體好之外，對提升床上戰鬥力亦有好處。

其實女人於早上亦特別適合進行性戰，快感分分鐘仲熱烈過晚黑！

由於工作關係，小弟近幾年都未試過10點前起身，令身邊嘅朋友對我非常羨慕。不過，佢哋其實唔知道，遲起身嘅原因正是我要晚間出外搵料遲上床之故。其實我亦好想可以早起身，皆因愈早起身，就愈覺啲時間襟用，而且成個人特別精神，集中力特別好。

朝早陽氣足

事實上，對於男人嚟講，朝早體內嘅睾丸酮素處於高水平，所以大家不難發現晨早起床嘅時候，胯下有一柱擎天之勢，有時甚至因勢度狂烈而喚起性趣。而中醫學說方面，亦表示朝早陽氣充足，此時起身吸納剛陽之氣於體內，自然助長「精力」也。

女性愛晨操

朝早除咗男人好狀態，適合進行晨操外，其實女性亦有此意願。根據美國哈佛大學嘅一項研究發現，女性嘅生理時鐘同男性有少許不同。男人一日到黑都準備進行房事，至於女性其實並不情願於即將就寢之時做愛，相對地，晨操則係唔少女性嘅首選。

不過專家表示，好多女性於有意無意之間，會抗拒晨操，原因包括佢哋怕自己起床時有口氣、未化好妝，亦怕晨操過後會影響整日嘅工作情緒及精力，因而唔想晨操。但專家補充話，晨操花唔到幾多時間同精力，而且可以提高體內賀爾蒙水平，令集中力都高好多。而專家亦提議早起嘅男女使用以下方法，增加晨操樂趣。

1.睡衣拜拜

唔少人都鍾意裸睡，認為身體全無束縛，發個夢都特別甜。不過一個人裸睡又有咩意思呢？梗係同伴侶齊齊一絲不掛相擁而睡至過癮啦！專家話男女一齊裸睡，除咗可以大大增加親密感外，當大家起身嘅時候，肌膚互相摩擦仲會輕易引發性趣，想唔做晨操都難！

2.落下窗簾

晨光高照，通知大家新一日已經來臨，不過晨光卻為女性帶來顧慮，就係怕自己毫無修飾嘅素顏畀對方睇得一清二楚。所以專家就話，想提起晨操嘅興趣，入睡前最好落下窗簾，令早上室內只有昏昏朦朦嘅光線，一來令女方冇咁尷尬，二來又可以製造浪漫氣氛，晨操都特別開心。

3.舌戰No Way

舌頭除咗布滿味蕾，仲充滿感覺細胞，令男女舌戰滋味無窮，難捨難離。不過朝早剛剛起床，少不免有口氣，此時舌戰必令對方難於接受，令性趣降到最低點。應轉而用口技刺激頸項、雙峰同大腿內側，反而可以激起快感。當然，刷過牙之後亦可以正常咀嘴，之不過刷完牙之後仲有冇性趣就係後話喇！