長腿公主徐杉

幾年前內地有一隊女子組合，曾經紅極一時，佢哋嘅名字叫做「明駿女孩」，但自從拆夥之後，當中好幾位成員都冇晒消息，只有身為隊長嘅徐杉仲繼續喺演藝界發展，而且成績仲唔錯添，今日就同大家介紹呢位嚟自遼寧嘅靚女喇！

徐杉自從冇做歌手之後，人氣不復當年，曝光機會大減，但佢並冇因此而放棄，反而努力轉型，最後成功改行做模特兒。其實徐杉身高170cm，加上一對煞食40吋長腿，天生一副模特兒身材，唔做Model真係嘥晒！

當女主角

而徐杉亦好唔錫身，只要有拍攝嘅機會，佢都搏到盡，將自己最性感嘅一面表露無遺，而相片出嚟嘅效果，亦都冇令人失望，張張相都噴血度極高，所以深得網友嘅追捧，將佢嘅寫真照片轉貼，因而人氣大升。

去年徐杉更有機會拍電影，飾演空姐一角，戲中佢大騷身材之餘，仲玩埋制服誘惑，結果電影上映後大獲好評，早前佢更得到香港著名導演鍾澍佳賞識，當上《公主的誘惑》嘅女主角。

筋骨柔軟

據講電影裏面會歌舞連場，而唱歌方面，應該難徐杉唔到，因為佢係唱歌出身，至於跳舞方面，佢都話冇問題，原來佢自小學跳芭蕾舞，所以電影中嘅舞蹈一定難佢唔到，佢仲話會親身上陣，唔使用替身添！其實我哋睇徐杉嘅寫真照片時，都發現佢筋骨十分柔軟，原來同佢有深厚嘅舞功底子有關。今年25歲嘅徐杉，正值當打之年，相信憑佢嘅實力同天賦本錢，喺演藝事業上一定可以更上一層樓。

徐杉Profile

出生地：遼寧鞍山

三　圍：34-26-37

身　高：170cm

興　趣：唱歌、跳舞