世界波：魅惑女人香

其實每種動物發情嘅時候都會從體內發出性氣味，藉此吸引異性進行交配。不過人類係萬物之靈，女人除咗可以利用自己嘅天然體香之外，更可以運用不同氣味嘅香水，挑起男人嘅情慾之餘，更可以令男人暈得一陣陣。

雖然好多女人都有噴香水嘅習慣，但未必個個都噴得其所，有時甚至適得其反。例如香水的氣味太強烈，會令男人覺得好刺鼻，就算噴啱位置都唔會有好效果。所以揀選一隻濃淡適中又帶點迷人幽香的香水是首要條件，第二就係要懂得喺不同嘅身體部位噴上，先可以發揮不同嘅挑情效果。

耳後頸背　若有若無

將香水噴於耳後或頸背，是一種若有若無、不太着迹的挑情方式。香水噴在這些地方，當有人靠近你的耳朵或臉部時，才能夠真正被這股香氣所吸引。對於初次約會，或是本身比較被動的女性來說，呢種挑情方法最好，既含蓄又不失暗示性。

腰間位置　溫水煮蛙

將香水噴在身體較低部位，其實是想增加香氣持久力，去別人家作客時適宜這樣噴。因為食飯嘅時間會比出去餐廳用膳更長，香氣隨住溫熱嘅空氣向上飄散，一邊食飯、一邊散發優雅清香，對方一定會喺不知不覺中被你迷倒。就像溫水煮蛙般，當對方察覺時已經中毒太深，全無還擊之力。呢種挑情策略最適合主動進攻型女性，一切盡在掌握之中。

擺動裙子　漁翁撒網

女性參加大型派對時，噴香水絕對係指定動作，不過喺一個大型嘅室內場所，如果噴得太多一定會好刺鼻，噴得唔夠又難以發揮作用，所以最好噴喺自己條裙上面，隨住你起舞時嘅擺動，將香氣散發於空氣中，男人就會好自然咁愈跳愈埋，繼而被你嘅香氣挑起慾火。呢種漁翁撒網式嘅挑情攻略，最適合派對女郎使用，佢哋夜蒲多過食飯，梗係要漁翁撒網搵食啦！

頭髮手腕　男人最受

大約有八成嘅女人都會將香水噴喺手腕、其次就係頭髮上，尤其是長髮披肩嘅女人，經常喜歡甩動頭髮，每次甩動都會將香氣散發到對方嘅鼻子之上，雖然橋有啲舊，但男人偏偏最受。另外噴喺手腕上嘅香水，一定要以淡味為主，因為對方會經常聞到，香氣一定要清新幽香，先可以令男人愈聞愈起勁，甚至忍唔住主動拖起你對玉手輕吻。