世界波：吻得出色女人得益
接吻係一種表達愛意嘅自然反應，亦係男女之間傳遞親密訊息嘅身體語言，無論係深入淺出，定係火辣激吻，只要吻得有技巧或是掌握適當時機，便足以扣人心弦，令剛烈嘅男人都馴化如綿羊仔。
雖然男人喜歡喺性事上做主導，但女人不妨喺接吻上多作主動，因為主動嘅一吻，隨時令男人神魂顛倒，不知所措，事後反而覺得你更加可愛。以下幾項接吻要點，女人一定要把握得宜，盡情發揮，自然對你有莫大益處。
突襲驚喜
突然而來嘅激情，永遠令人着迷，所以女人不妨喺對方冇防備之時，或是一啲意想不到嘅場地，例如僻靜街角、人來人往嘅月台，或趁佢喺屋企睇書睇到入晒神之際，失驚無神送個熱吻畀佢，好易令佢覺得驚喜萬分。女人呢種調皮態度，會令男人感到興奮莫名，而女人吻得太突然，雖然會令男人剎那間不懂反應，但事後卻能回味再三。
欲擒先縱
欲拒還迎這一招，應該好多女人都識得用，如果你都係箇中高手，就應該將呢套理念發揮於接吻之上。輕輕一吻，就立即分開，呢種挑逗性嘅行為，往往最令男人心癢難耐。對喜歡捕獵嘅男人嚟講，女人挑逗嘅威力簡直就係催命符，將佢哋體內嘅慾望完全喚醒，一定要將眼前嘅女人徹底征服，先可以撲滅慾火。
先攻後守
濕吻係一種講求技巧嘅接吻，好多男人都好粗魯，唔理三七廿一，下下都咀到伸晒脷，而且好有攻擊性，搞到女人不期然會產生抗拒心理。所以女人不妨一開始就作出主導性嘅誘惑，令男人知道點樣濕吻先至令女人開心。但過程中又唔可以太霸道，令男人覺得冇癮，最好就係先攻後守，滿足男人嘅佔有慾望。
呼吸煽情
女人要一邊接吻，一邊發出呻吟聲，梗係有難度啦，把嘴都畀人封住咗，點出聲呀？所以一定要靠呼吸聲去表達，仲要有咁煽情得咁煽情。男人喺呢個時候，特別易氹，女人只要加多兩錢肉緊，出盡力呼吸，好似抖唔到氣咁，就會令男人覺得特別興奮，完全任由你擺布。
敏感耳仔
男人嘅耳仔其實好敏感，尤其是當兩個人仲未進入戲肉之前，輕吻耳仔係一件會令男人興奮到毛管戙嘅事。如果女人再進一步，將舌頭伸入耳蝸，輕輕咁舔，更會令男人興奮無比，若然再加多一兩句甜言蜜語，效果分分鐘好過食「偉哥」！