世界波：危險前奏傷身又壞腦

根據美國成人雜誌調查指出，有3種性愛前奏，一般人都認為係性愛催化劑，但經臨床實驗後，卻發現3,000名參與者當中，有6成人做咗呢3種前奏之後，對性愛不但沒有幫助，反而有壞影響，所以話一本通書絕不能睇到老。

呢3種性愛前奏分別係飲酒、沖熱水涼同睇四仔，相信有唔少人都曾經喺性愛前做過以上3項前奏，所以中過招嘅人一定唔少，而有幸未曾出過事嘅朋友，可能唔係幾信，但睇過以下嘅調查報告內容就知唔係危言聳聽。

酒精傷身損精

報告指因為有太多電影橋段講述情侶喺酒精刺激下，變得慾念高漲，繼而大戰連場，結果令到唔少睇電影睇得太多嘅人，誤信酒精嘅作用。其實酒精表面上的確能夠刺激人類嘅性慾，但可惜內裏嘅壞影響更多。中醫自古便認為，酒後行房耗氣傷精，飲酒後大腦神經系統興奮性雖暫時增強，但係性功能卻會暫時減退，女人更可能出現卵巢功能障礙，影響正常排卵，而男人則會有勃起困難或令性交時間縮短。酒後性愛更會對男人嘅睾丸有損害，減弱佢產生性激素嘅能力，即係長期喺飲酒後做愛，最終會傷身兼損精。

危險指數：5

水太熱易眼瞓

喺做愛前一齊沖個鴛鴦浴，有情趣又夠衞生，的確係無可厚非，但如果將佢當成前奏的話，就一定要注意細節。首先水溫唔可以太熱，因為太熱嘅水會令身體血液循環加速，自然消耗大量體能，起初的確係好精神，但同時好快就會昏昏欲睡，想興奮都難。另外，千祈唔好沖超過10分鐘，因為沖得太耐，人就會愈來愈鬆弛，最終全身進入休息狀態，一旦即刻進行激烈性愛，會對體內各器官造成損害。最重要嘅一點係，女人浸得熱水太耐，會令皮膚嘅敏感度降低，影響咗之後互相愛撫嘅刺激感覺。

危險指數：4

太刺激會中風

報告指出美國四仔嘅起源，原因之一的確係為咗刺激人類嘅性行為，有研究指四仔片的確可以令人體內嘅性激素含量增加幾個百分點。不過隨住時代愈來愈進步，四仔嘅官能刺激都愈來愈厲害，結果令人體嘅神經系統極度興奮，喺咁刺激嘅情況下做愛，大腦好容易就會出現缺氧狀態。短時間可以令你更High，但長時間就會出現頭暈、虛脫，所以好多人激戰之後，都會覺得頭暈腳軟，千祈唔好當係正常呀，好有可能係腦部曾經缺氧所致，長此下去，心臟同大腦功能都會受損。

危險指數：3