好Sex必讀性愛冷知識

香港人工作時間咁長，壓力又大，唔好話床事，

就連身邊好多生活小智慧都會錯過咗。其實只要偶然停一停，(目及)一(目及)，就可以發現有好多細微事情，竟然對性愛有幫助。呢啲性愛冷知識，雖然好濕碎，但又的確好實用，仲可以為你慳番唔少炮製情趣嘅錢添！

以下四種關於性愛嘅冷知識，不但可以增加性趣、仲關乎精子健康，更可以為女人慳番唔少豐胸錢，咁有益嘅性生活小智慧，大家當然要知啦！

勤做家務 床上回報

美國加州大學社會學家指出，男性做家務嘅次數，同性生活嘅次數原來有直接關係。原因係當女人睇到男人做得愈多家務時，佢哋就會愈開心，女人心情開朗，自然會更願意做愛。而男人願意分擔家務，亦會令女人覺得兩性關係公平啲，衝突自然減少。喺咁和諧嘅情況下，雙方嘅性趣都會大增，好容易擦出性愛火花，就算幾忙都忍唔住要執番劑啦！

慎食芹菜 控制生育

泰國詩里叻醫院嘅生理科，經過10年研究，發現男人經常食芹菜，會減少精子嘅數量。醫院嘅測試對象係2,000名年齡介乎18至20歲，健康狀況良好、有生育能力嘅男人。測試期間，佢哋每日進食75克芹菜，連續兩個星期後，發現佢哋嘅精子數量明顯減少至難以受孕程度，但停吃後16周又慢慢恢復正常。所以有心生仔嘅夫婦，就唔好食咁多芹菜，但好色又唔想生仔嘅男人就不妨多食，萬一個「袋」穿咗，都冇咁易搞出人命。

高EQ女 高潮連連

倫敦大學國王學院嘅心理學家，曾經向過千名女性進行問卷調查，查詢佢哋嘅性行為同埋性表現，同時亦測試埋佢哋嘅EQ，內容包括自我表達能力以及是否容易滿足等等。結果發現，EQ較高嘅女人，獲得性高潮嘅次數足足比EQ低嘅女人高出一倍。呢項研究結果清楚指出，EQ可以影響女人向伴侶表達自己嘅性期望，當女人善於表達自己嘅情感，能夠獲得嘅高潮就愈多，所以女人唔好再指桑罵槐，想點不妨直接講。

性愛愉快 天然谷奶

一場愉快嘅性愛，除咗可以令女人嘅內分泌得到平衡，睇起嚟容光煥發之外，竟然仲可以豐胸？有美國性學專家經過3年嘅研究之後，發現愉快嘅性生活，可以幫助調節女士嘅內分泌之餘，仲會刺激孕激素增加，從而加強對乳腺嘅保護同修復，令對波睇起嚟好似大咗同埋更有彈性。咁即係話只要做多幾場愉快性愛，就唔使花咁多錢去隆胸啦！