世界波：每日抱抱囡囡冇投訴

男人要得到性滿足好容易，因為佢哋只要返屋企，閂埋房門就可以自我娛樂一番，只要唔好學傳說中連續自娛42次搞到暴斃嘅16歲巴西少年就得喇。不過，要令女伴得到性滿足，或者要花啲精力同工夫，但原來攬多幾下都好有幫助o架！

男女身體構造大不同，所以得到性滿足嘅途徑亦不一樣，世界上就有唔少女人，於有生之年都未嘗性高潮，又何來滿足之有？正因為咁，好多男人為咗滿足女伴，都會尋找不同方法。有人會研究印度《愛經》，挑出最能夠引爆女性高潮嘅體位；有人就會欣賞鹹片，參考AV男優嘅各種性技；亦有人會面懵懵咁去情趣用品店，向售貨員請教功能最強嘅情趣玩具點樣玩。不過有專家教路，原來要令男女雙方俱得到性滿足，只要一日同佢攬攬錫錫３次就搞掂晒！

攬攬錫錫好快樂

美國印第安納大學嘅研究員，早前為男女之間嘅互動行為，對於彼此之間嘅性同愛有何影響而作出調查。調查訪問咗約1,000對來自日本、美國、巴西、西班牙以及德國嘅男女，發現男方如果每日同伴侶錫錫、擁抱達3次，彼此關係嘅快樂程度，比起冇得攬攬錫錫嘅男人為高。

而女性方面，平均只需要1.59次上述行為，就會覺得關係更加愉快，而有攬攬錫錫嘅男女，俱得到較高嘅性滿足度。咁簡單就可以令女方得到性滿足？係真唔係呀？其實以往有好多報告都指出，女性要得到性滿足，唔一定單靠做愛，充足嘅前戲都一樣可以為女性帶來歡娛感覺，攬攬錫錫其實咪又係前戲嘅一種！

性伴愈多愈難滿足

調查同時發現，受訪嘅男士平均每人有11.9個性伴侶，而女士則有4.9個。但係愈多性伴侶嘅男士，性滿足程度卻相對較低。點解呢？唔係愈多性伴侶，就愈多機會上床咩？

非也，原因正係同需求有關。男士愈要搵更多性伴，就代表佢哋愈唔能夠搵到一個真正能夠滿足自己嘅性伴，道理正如往日嘅富人愈娶妾侍就愈生唔出仔女一樣。另外，調查仲有一個有趣並且打破世人對男女感情關係誤解嘅發現，就係男人覺得情感上愈滿足，愈會驅使佢哋同伴侶關係更長久；至於女士就要得到更強嘅性滿足，至可以同伴侶保持長久關係。所以女士如果想男伴唔變心，記得要用心關愛佢哋；而男士要Keep好段關係，亦切記先要Keep好副偈，預備為女伴提供床上大滿足！