世界波：血型知性趣床上好配對

古時嫁娶，通常會先夾夾男女雙方嘅八字，睇吓兩個人是否珠聯璧合。現代人好耐已經唔興呢一套，結婚最緊要啱Feel，當然婚後「性」福與否亦係考慮因素之一。女人唔想嫁錯外強中乾男，就記得要問吓佢係咩血型喇！

根據美國性學專家做嘅統計研究，單從不同嘅血型分析，已經可以偷窺到不同類型男人嘅性能力、做愛次數等，仲可以知道佢哋對性事嘅睇法添！

A型男速戰又賣力

A型男平均做愛時間約為4分26秒，係四種血型中最短嘅，即代表持久力較弱，但做愛次數卻係四種血型中最多嘅，平均每年有196次，每隔1.86日就做一次，所以自問性趣不大嘅女人，千祈唔好揀A型男做伴侶。相反，如果你都係無性不歡的話，A型男就啱晒，佢哋喺床上仲好賣力添。佢哋鍾意愛撒嬌嘅女人，如果喺床上對佢撒嬌，佢一定會雙倍回報你。而A型男平均一生中只有4個性伴侶，專一度排第二。

專一度：●●●●

持久度：●●

次　數：●●●●●

B型男重質大情聖

B型男鍾意享受開放嘅性生活，不喜歡拘謹，或是有束縛嘅婚姻生活。簡單嚟講，佢哋認為愛同性係兩回事，即是話佢哋嘅出軌指數會好高。所以自問想搵個超級忠心穩定嘅男人，就咪揀B型男。事關佢哋唔鍾意結婚之餘，就算拍拖都隨時會一腳踏幾船，係天生花心漢。

不過B型男喺床上表現又的確係幾好，持久力係四種血型中最強，平均做愛時間有7分11秒；而做愛次數又係最低，絕對重質不重量，注定係天生嘅情聖。平均一生中約有8個性伴侶，比A型男高出一倍。

專一度：●

持久度：●●●●●

次　數：●●

AB型男保守好老公

AB型男嘅個性比較嚴肅，唔輕易同女人上床，不過同時又對性要求好高，除咗有潔癖之外，仲會介意伴侶係唔係處女，如果自問係豪放女的話，千祈唔好揀佢，否則一定冇好下場。

因為AB型男喺性趣方面，偏向保守，唔鍾意玩情趣用品，又唔係好鍾意搞氣氛，同佢做愛好似例行公事咁，但就絕對係一個好老公。因為佢哋平均一生中只有3個伴侶，係四種血型中最專一嘅，而平均做愛時間有6分10秒，持久力排第二，表現都算令人滿意。

專一度：●●●●●

持久度：●●●●

次　數：●●●

O型男規矩不浪漫

O型男喜歡有規律嘅性生活，佢哋覺得做愛係人類天生嘅需要，就好似肚餓要食飯一樣咁實際，因而浪漫欠奉。一般O型男喺雙方交往過程中，都鍾意循序漸進，隨住感情熱度升高而發生性愛，唔會太刻意製造浪漫，都算係幾規矩嘅男人。床上表現都幾認真細心，不過事後好快就唔記得，所以自問用情甚深嘅女人，要諗清楚先好揀佢哋，因為佢哋對愛情同性都唔太重視，只當係一種需要。佢哋平均一生中有6個性伴侶，係第二花心o架！

專一度：●●

持久度：●●●

次　數：●●●●