修養美女王丸丸

呢位靚爆鏡嘅模特兒，外形時尚，能說一口流利英語，甚至連法語都難佢唔倒，大家一定會以為佢係一個非常崇洋、思想開放嘅女仔，但當你知道佢會彈古箏及寫得一手好書法時，就會覺得佢好有修養，呢位咁特別嘅靚女就係王丸丸。

今年22歲嘅丸丸，於09年出道，憑住秀麗嘅外表及惹火身材，令佢迅速紅遍網絡界，隨即拍攝工作不斷，成為北京模特兒界嘅天之驕女。

俘虜宅男

丸丸身高165cm，擁有34E上圍，即使着咗衫都遮掩唔到佢副玲瓏浮凸嘅身材，更何況佢初出道時曾拍攝大量性感寫真，張張照片都噴血度高，唔少宅男都因此成為丸丸嘅俘虜，佢哋唔止珍藏，仲瘋狂轉貼分甘同味，令丸丸人氣大升。另外，唔少內衣公司都睇中丸丸嘅火辣身材而搵佢做模特兒，更有傳聞，只要雜誌社搵到丸丸做模特兒，就唔憂搵唔到內衣公司贊助，足見丸丸幾咁受歡迎。

愛古文化

丸丸喜歡當模特兒，但佢就唔太喜歡五光十色嘅生活，最鍾意係彈古箏，而且已學藝10年。此外，佢仲寫得一手好書法，咁有修養，丸丸嘅性格會唔會好內向呢？佢話自己喜歡古文化，但不喜歡守舊，做人要破舊立新，咁樣先至會不斷進步，丸丸果然人又靚又有腦筋，喺呢一行想唔紅都幾難。而佢下一步嘅發展，除咗做模特兒之外，仲會踩入影視界，而佢就以做出色嘅主持為目標，因為可以接觸更多嘅人，至於拍戲做演員，佢話暫時未有考慮喎！

王丸丸Profile

現居地：北京

三圍：34E-24-34

身　高：165cm

興趣：書法、彈古箏