Gossip Monday

過咗一個甜蜜嘅周末，成個人都精神晒，好似叉足電咁，波士Richard見到我笑得咁甜，就知道我周末開過大餐。不過佢好含蓄，只係畀咗個陰陰笑嘅眼神我，暗示佢有幾羨慕。我身為佢秘書，一定唔可以威過佢，再加上我同佢都未熟落，點知佢係唔係笑面虎喎。我做咗班高層嘅秘書咁多年，好穩陣嘅！所以我今日特別落力，事無大小都親力親為，將佢照顧得妥妥當當，令佢簡直當我係女神一樣。

差唔多收工，收到樓上Macy嘅電話，八吓公司最新嘅是非，其中一個更關乎我波士嘅切身問題。事緣樓上原來早就有人吼住我上一手老細Dave個位，知道佢會畀人炒，已經有所動作，可惜畀CEO快一步，請咗個自己人入嚟，於是上面好唔妥，仲想密謀造反添！

Macy知道呢單料關我事，自然出力咁八，不過佢只係發掘到啲皮毛，對我嚟講，作用唔大，如果想再深入啲，睇怕都要我親自出馬，電一電樓上個鹹濕總監先得。

我收線之後，諗咗好耐，究竟好唔好出手呢！事關我對Richard仲未摸清底，雖然表面上睇佢應該係個唔錯嘅上司，如果佢留低，對我絕對有好處，但就算佢畀人搞走咗，我亦冇乜損失，所以我決定暫時按兵不動。諗通咗之後，終於回復靚心情，一於行過隔籬街買對Giuseppe Zanotti先。女人無論心情好壞，都要買鞋，呢個牌子嘅高踭鞋近期紅到爆，幾大都要買番對……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。