Role Play 玩大咗
美國人玩角色扮演已經玩咗幾十年，好多人都玩到出神入化，不過最近喺加州就有對夫妻玩角色扮演玩大咗。搞到差啲畀人拉。事緣老公租咗套警察制服，喺路上截停老婆架車扮抄牌，然後老婆就扮色誘對方求情以平息事件。原本條橋都幾有趣，衰在有路人以為係真，見個女人畀警察欺凌，就偷偷報警，結果兩個人搞嘢搞到一半，就有警察上門拉人，今次仲唔係玩大咗？
樂此不疲
呢對夫妻一向都熱愛玩角色扮演，平時喺屋企點玩都冇人干涉，估唔到佢哋為咗尋求刺激，竟然由屋企玩到出街，好衰唔衰又遇到好心人，唔知今次算唔算好心做壞事呢。
結果老公依家隨時有機會被控冒警，不過兩公婆仍然對角色扮演樂此不疲，老婆更話最多以後唔出街扮，留喺屋企玩，就算扮第一夫人都冇人可以阻到佢咁話喎！