性感打女李晨熙

今日小弟介紹一個靚女畀大家認識，佢就係嚟自遼寧瀋陽嘅李晨熙喇！阿妹於09年入讀北京電影學院表演系，及後被廣告商睇中，接拍過唔少廣告，佢一舉手一投足都充滿魅力，而且形象百變，故未畢業已經成為人氣模特兒。

小熙喺模特兒界人氣高企，皆因佢本身係一個超級大美人，樣子甜美討好，而且身材高挑，行出嚟夠晒台型。最冇得彈嘅，就係阿妹玲瓏浮凸嘅身材，上圍有35D，配上24吋纖腰，絕對係完美極品，而阿妹每次拍攝廣告和硬照時，一啲都唔錫身，盡騷波地，難怪令一眾粉絲都為佢瘋狂。

多才多藝

除樣靚身材正之外，小熙亦多才多藝，原來佢未入讀北京電影學院之前，喺鐵路文工團當舞蹈員，舞藝精湛，亦因為佢有舞蹈底子，所以近年佢除咗努力喺模特兒界發展外，亦想轉戰娛樂圈闖一番事業，而且仲選擇走動作女星嘅路線添。最近佢真係夢想成真，同洪金寶合作拍攝一部功夫電影，成功當上動作女星，雖然只係二線角色，但甫出道，就能夠同影壇大哥大合作，可謂前途無可限量。

胸大有腦

點解話小熙欲投身娛樂圈，可以睇得出佢係一個聰明女？因為小熙知道模特兒生涯好短暫，唔可以做得太耐，而且每年都有新人排山倒海咁出現，好容易就會被淘汰。但轉戰做影視明星，機會就有很多，特別係佢唔怕辛苦，選擇做打女，一來市場大，競爭對手少，可以話長拍長有，二來佢外形性感，現今內地影壇正欠缺性感打女，而小熙亦希望可以打出名堂，咁小弟亦預祝佢成功啦！

李晨熙Profile

出生地：遼寧瀋陽

三圍：35-24-36

身高：170cm

興趣：聽音樂、看電影