奧地利男人 1比29 Honey多

成日都話男人係用下半身思考嘅動物，所以經常受唔住誘惑，做出越軌行為，同其他女人搞埋一齊。到底邊種國籍嘅男人最濫、擁有最多性伴呢？美國？法國？定係性開放嘅荷蘭？答案竟然係奧地利人。

根據某著名安全套生產商最近一次嘅調查得知，全世界最多性伴侶嘅男人，原來係奧地利人。調查涵蓋接近30個國家，以調查男士性伴侶數目為目的，而性伴侶嘅定義，係指唔包括召妓而發生關係嘅伴侶。榮登榜首嘅奧地利人，每個男人平均都有約29個女伴，數目之多令人咋舌，若然每個囡囡都玩一晚，日日唔停咁做都要輪足一個月。

浪漫情懷

奧地利人能夠高踞榜首，有學者認為可能同佢哋嘅地理、文化有關，由於佢哋與意大利相鄰，所以擁有南歐人嘅浪漫色彩，加上奧地利係歐洲嘅文化古都，去到邊都充滿浪漫情懷，特別容易令人動心，但最重要係當地女多男少，女性多男性4%，物以罕為貴，自然爭住要搵男人安慰。

第二位則係雙亞軍，女伴嘅平均數目同樣係28位，分別係希臘同俄羅斯。俄羅斯嘅囡囡出晒名人靚身材好，特別係金髮俄妹，更係不少男士心中嘅女神，加上風情萬種，自然引起男士嘅性趣。

火辣熱情

有人會問：希臘嘅囡囡喺國際上可以話不見經傳，能夠佔上第二位真係有啲出奇。其實佢同奧地利一樣，都佔有地理同埋文化上嘅優勢，導致當地人特別浪漫，只要兩情相悅，就好容易會走埋一齊，有網友就話啲男人就係掛住溝女，先會搞到金融危機都唔識死喎。

至於第三位就係巴西，平均每個男人，都有約27個性伴侶。其實巴西勇奪第三位可以話係實至名歸，事關巴西嘅囡囡個個都好身材得嚟又熱情，只要男士五官端正，都應該不乏美女垂青，當地更被美國玩家稱為艷遇天堂，想食好嘢絕對冇難度。

打破觀念

至於第四同埋第五位，分別係澳洲同埋瑞士，呢兩個國家民風咁淳樸，但原來性方面都好開放，係咪有啲意外呢？據聞第四位嘅澳洲男士，平均有25個性伴侶，而第五位嘅瑞士男性，則報稱約有24個，睇到咁嘅調查結果，只可以用句估佢哋唔到嚟形容，特別係澳洲男士，大多數都畀人一種好好先生嘅形象，但卻竟然擁有平均25個性伴！

至於大家都以為性觀念好開放嘅美國男士，調查指出佢哋嘅伴侶平均數，竟然只得13個，輸畀人家一大截。所以同志們，有兩、三個女伴咪再牙擦擦喇，有番20個以上先至好晒命呀！