沖涼緊要過做愛
近年收費電視台幾個外國電視頻道，經常播放求生系列節目，主持人獨自去到荒野之後，除咗要盡量搵食水同食物，有時仲要想辦法應付極端氣候，見到佢哋為咗求生而無所不用其極，更不惜茹毛飲血，睇到人有少少心寒，但亦反映到我哋生活於樣樣都有嘅環境中，實在好幸福。諷刺嘅係，家陣唔少地方都出現饑荒，災民好似上述主持人一樣求生嘅同時，好多人都覺得自己如果冇得上網一個月就會死，慘過冇得做愛！美國一個傳媒機構較早前進行過一份問卷調查，問題係「有哪三項事情如果缺乏一個月，會令你不能活下去？」結果發現受訪男女嘅第一位都係上網，其次係睡眠，至於第三位，男性就認為係做愛，而女性則認為係沖涼。相比之下，顯示出女性原來覺得沖涼比做愛更重要，難怪佢哋成日都叫男伴上床之前，一定要沖乾淨涼啦！