後頸有肉 重享受

後頸位置如果長出厚肉,對男士嚟講,原來係件好事,代表福祿雙全,但要留意一點,摸上去唔可以太硬太實,事關地盤工人嘅後頸一樣肌肉發達,但完全同福祿無關,不過太軟亦唔好,代表身體有毛病,所以一定要軟硬適中至為之Good。

男士後頸有肉,人就心地無毒,而且交遊廣闊,得到好多朋友嘅幫助,貴人運不俗,所以工作順利,財運特佳。至於愛情運方面,佢哋心地善良,所以喜歡佢哋嘅女仔都唔少,但佢哋比較怕醜,開始第一步或打算結婚時,最好由女方做主動,否則就有排拖。

至於床上表現,佢哋都熱中床上運動,特別係新婚嘅時候,佢哋會為對方做好多嘢,特別注重前戲嘅安排。同佢哋去開房,絕對唔會去時鐘酒店,去親都係星級酒店,浪漫氣氛、音樂、美酒,一應俱全,總之冧死人,但到咗40歲後,就唔會搞咁多花臣。

達達