鬥陰毒

肥牛同小娟係一對拍咗拖好耐嘅情侶，今日就相約一齊去行山，享受置身於美麗大自然嘅樂趣。二人好辛苦由山腳行到上山頂，然後就搵個樹蔭歇息，並且共進午餐。不過，二人一邊食飯，卻一邊互數不是。

肥牛先話：「小娟，你啲廚藝其實改善一下會好啲。」小娟就話：「你嘅床技夠要改善啦。」男人最怕就係女伴挑剔自己嘅床技，於是肥牛就發火話：「我都知你嫌我唔夠長好耐o架喇！」小娟又發火話：「你夠成日嫌我係長平公主啦！」二人你一句我一句，鬧咗一輪之後進入冷戰，然後面左左咁一齊落山。

去到山腰，二人就見到一名行山人士被蛇咬中腳趾，成隻腳趾腫晒。行山人士惟有急忙自啜腳趾，啜出毒血，但係腳趾依然腫脹。為安全起見，仲用膠袋袋起條蛇，方便一陣送院療傷時可以對症下藥。呢個時候，小娟就向行山人士話：「條蛇可唔可以借畀我呀？呢個死佬，下面細到好似未發育過咁，用嚟咬吓佢等佢有番啲睇頭啦。」肥牛聽到之後就左望右望附近嘅草叢話：「哼！個衰婆對胸平到洗衫板咁，一條蛇肯定唔夠，等我捉多條蛇打孖對付佢。」