埋牙前驗身
同新相識嘅男女開波前諗一諗係好正常，事關要保護自己嘛！但講就容易，莫非當面問人有冇性病，甚至拉對方去驗身咩？當然冇可能啦，喺呢一方面，日本人真係非常醒目兼細心，早就為大家做足準備，一包紙巾就可以Check到對方玩唔玩得過！
眼前呢包「紙巾」望落好普通，其實大有乾坤，將紙巾印喺性器官上，兩分鐘內就知結果。紙巾有3種顏色警示，可Check到閣下嘅pH值（酸鹼度），若紙巾上白色嘅「Bad Check」字樣變成橙色代表正常，雙方可以安心搞嘢；但若然字體由白色變黃色，即代表身體呈酸性，對方可能有糖尿病、痛風等症，搞搞吓或會暈到；如果字體變成鮮紅色，奉勸各位即刻着衫走人，事關當事人大有機會患有尿道感染及性病。好明顯呢件產品係為保護女性而設，皆因男人慾火焚身時，仲邊會考慮到咁多安全措施吖！