女僕餐廳殺入長沙

繼北京、上海、廣州等大城巿先後引進咗日式女僕餐廳之後，最近喺湖南長沙市亦悄悄開咗一間女僕咖啡店，而老闆更係個啱啱滿28歲嘅年輕人。老闆請咗8個年輕靚女做女僕，客人踏進店門時，會嬌滴滴咁叫喚：「歡迎回家，主人！」走時一句：「主人，請你一定要回家啊！」不知冧死幾多人。

着牛仔褲打底

據老闆講，佢哋嘅客路主要針對動漫迷同大學生，但咪以為佢哋只招待男士，原來女士入去幫襯，佢哋都會稱呼女客為大小姐，一句：「大小姐，有甚麼吩咐？」都氹得女士們眉開眼笑。

而同其他大城巿唔同，呢間餐廳嘅規矩比較多，而且仲貼晒出嚟，作為溫馨提示。例如客人唔可以同「妹頭」（即女僕嘅親暱叫法）約會同攞佢哋嘅聯絡方法，而且更唔可以同妹頭有任何身體接觸，就算影收費合照時，亦唔例外。

除此之外，據講公司仲規定囡囡喺裙下面要着打底褲，最好仲係牛仔短褲，唔通驚有人會揭開囡囡條裙嚟(目及)嘢？

據老闆解釋，咁做係因為此地民風唔同，大城巿嘅客人接觸得多，對女僕餐廳玩法比較明白，但內陸城市則冇咁清楚，如果一開始做壞咗個頭，就好容易畀人誤會女僕咖啡店係色情場所，所以一開始都係嚴格啲好，而且仲可以保障店員人身安全，可謂一舉兩得！