職場性騷擾
每次同班兄弟落酒吧消遣，我一定會玩得好開心，唔少兄弟都會問：「肥仔，返工又唔見你咁好唱口，家陣好似開籠雀咁，一定係酒精令你咁High啦！」此乃原因之一而已，最大原因其實係公司有好多女同事，怕自己一時多口講咗啲鹹濕嘢，令人誤會我性騷擾佢哋，到時惹上官非就麻煩喇！
早前睇咗日本最新嘅一項職場性騷擾調查結果，發現唔止女職員受到性騷擾，唔少男職員亦係受害者。據資料顯示，於職場當中，有16.8%嘅女職員受過性騷擾，而男職員則有3.6%。從結果發現日本OL受到性騷擾嘅比率的確幾高，不過亦可發現男職員亦係受害者。至於男職員受到咩嘢性騷擾呢？據調查報告表示，包括女上司邀請男下屬入會議室，然後進行挑逗、女同事要求為其按摩肩膊、聚餐時被女同事借意胸壓等。睇嚟日本嘅職業女性都幾豪放喎！