全裸行山徑

行山係老幼咸宜嘅健康活動，不過有唔少地方需要留意，例如行山嘅時候要留意天氣報告，仲要着淺色衫同長褲，既可減低被蚊蟲咬傷，亦可避免山石樹枝擦傷玉腿。不過，呢個呼籲相信對德國部分行山愛好人士嚟講完全冇用，因為當地有一條全裸行山徑，專門招呼鍾意赤條條，親親大自然嘅裸體行山愛好者。

成功爭取

呢條位於德國中部小鎮丹克洛德（Dankerode）近郊嘅行山徑，係德國第一條全裸行山徑。一眾裸體行山愛好者，真係要多謝當地經營營地及餐廳嘅老闆Heinz Ludwig喇，事關同樣係裸體行山愛好者嘅Heinz Ludwig，早年成功向當局爭取設立呢條行山徑，而且仲於行山徑開放之前，將沿途嘅帶尖刺植物清理好，以免同道中人行山時受傷添！

全裸行山徑開放後，除咗令德國好此道人士雀躍之外，亦令瑞士嘅同道中人好開心。因為瑞士當局曾經下令禁止此類活動，自從德國有咗裸體行山徑後，瑞士那邊嘅同好終於可以再次赤裸裸咁擁抱大自然喇！