女仔愛傳訊「色」
家陣嘅手機唔單止係打電話咁簡單，一系列智能手機可以聽歌、上網、睇短片同玩遊戲，大家行街或者搭車，應該都會見到唔少男男女女揸住部手機玩到着晒迷，幾乎玩到唔識得落車。對於好多女仔嚟講，手機最重要嘅功能唔係玩遊戲或者聽歌，而係同朋友互傳短訊，由於熟能生巧，好多女仔已練成極速手機打字法，再發出短訊嘅技術，返工打字又唔見佢哋打得咁快。
男士們即使睇唔過眼呢班女仔成日沉迷傳短訊，但為咗溝女，亦都要玩埋一份喇！根據美國一本成人雜誌嘅調查發現，受訪嘅1,001名女性當中，高達71%曾經試過同伴侶用手機玩Sexting，即係互傳色情短訊，可見現時嘅女仔習慣用短訊同伴侶調情，甚至視為溝通方法，所以各位男士家陣就要練好手機打字，對於日後溝女絕對有莫大幫助o架！