緊抱愛人過節日

無論係小節日定係大節日，大家都係想開開心心啫，而最開心就莫過於同愛人一齊溫馨度過喇，好似立陶宛一班猛男咁，佢哋過節嘅時候決定同「愛人」一齊渡過難關。點解愛人二字要特別括住佢？因為呢班猛男嘅愛人唔係人，而係吹氣公仔囉。

攬住公仔游水

呢一日對於立陶宛嘅男性嚟講，可以稱得上係大節日，因為呢日正係立陶宛嘅「全國男士節」（National Men's Day），不過有一班男士冇選擇上街大事慶祝，而係去到首都維爾紐斯（Vilnius）嘅涅里斯河（Neris River）進行一項考驗膽識同體力嘅游泳比賽「Barracudas 2011」。

雖然比賽只需要男士游250米，但係當日河水溫度甚低，而且參加嘅男士仲有一個重要任務，就係全程要攬住自己帶嚟嘅「愛人」，即係珍藏嘅吹氣公仔一齊游！最快到達終點嘅一對參加者，就可以獲得相等於250英鎊嘅獎金。

由於當日報名人士眾多，所以喺200多名報名男士當中，只有20個被抽中參加比賽，不過由於每個男士都要帶埋「愛人」玩渡河，所以場面一樣睇頭十足，兼且相當惹笑！