鼻泛紅光會破財
俗語有話：「紅光滿面財運至」，但要注意紅光如果喺五官上出現，係有唔同嘅效果。就好似主財運嘅鼻頭，如果你發現突然鼻泛紅光，並唔係代表你會鴻運當頭，反而係破財嘅先兆，如果係男士，更有可能會因財失義，朋友都冇得做！
做佢哋女朋友嘅一定會問，佢哋啲財如果係因女朋友而破，呢個劫會唔會化咗呢？原來係唔會嘅，破財一定會係事實，被朋友破財，佢哋就會有朋友做，但如果破喺女朋友身上，輕則口角，重則分手都有可能，所以咪見男友鼻紅紅就乘機落藥氹佢使錢，分分鐘會有非常嚴重嘅後果出現。
而喺感情上，由於佢哋嗰排脾氣會特別躁，女朋友都係少惹佢為妙，就算佢向你哋傾訴，你哋亦要輕輕帶過，唔好乘機教訓。至於性事上嘅表現，佢哋會比平時特別勇猛，但一過咗道火，又會回復本來面貌。