開朗男魅力低？
每次同班兄弟落酒吧消遣，少不免會結識一下同場嘅女仔。不過，小弟至今都溝唔到女，我自問唔係醜樣，性格開朗，為人幽默，每次都哄得大家好開心，唔明點解啲女仔唔鍾意我。直至睇完英國哥倫比亞大學一項調查報告後，我終於明白自己溝唔到女嘅原因，原來係衰性格開朗，真係估佢唔到！
該調查各搵咗男女500名協助，喺進行調查期間，佢哋要對住部電腦睇多張異性相片，相中人有開朗型、自信型、怕醜型以及木訥型，佢哋要一邊睇相一邊評分。結果發現不同類型嘅異性，對於男女嘅吸引力各有不同，被男人評分最高嘅係開朗型女性，相反，開朗型男性於女受訪者當中，則取得最低分數，仲低過怕醜仔！點解會咁嘅呢？據該調查負責人表示，原因係同我哋嘅生殖本能有關，男人之所以覺得開朗型女性吸引，因為呢類女性容易親近，亦容易滿足生育要求；而女性唔鍾意開朗型男性，係覺得佢哋太過活潑及擅於交際，缺乏安全感。原來如此，咁我下次要扮怕醜仔去溝女至得喇！