吹氣路邊雞

香港嘅交通頗為方便，除咗有大量巴士、小巴、渡輪同鐵路連接不同區域之外，就算自己揸車需時亦唔係耐，皆因香港實在係太細。不過，相對於香港，外國由於地域廣闊，要揸車到目的地，分分鐘要多個鐘頭，甚至超過一日。面對一條長到好似冇盡頭嘅公路，駕駛者忍得住唔打瞌睡，亦會悶到發慌。但係，如果係波蘭嘅道路使用者應該冇呢個煩惱，因為波蘭嘅公路旁邊隨時有路邊雞恭候！

自助宣洩慾火

喺一片荒涼之地都有企街做生意？真係難為佢哋喇。其實都唔算，因為呢班路邊雞並唔係真人，而係吹氣娃娃！較早前，有人發現波蘭一條公路旁邊出現各式吹氣娃娃，而佢哋身邊仲豎立咗個告示牌，寫住「自助服務」，收費為1歐元。據講呢批吹氣路邊雞正是為貨車司機而設，目的就係為解決佢哋揸長途車谷出嚟嘅鬱苦及久久未能宣洩嘅慾火，可有助減低交通意外咁話喎。不過計我話，日光日白見到佢哋都冇問題，但係夜闌人靜嘅時候經過，分分鐘以為遇到公路亡魂，一個唔小心，分分鐘引發交通意外添呀！