食色同重視
幾位女性友人都向我呻，話佢哋男朋友滿腦子都係色情思想，叫佢哋努力返工搵錢，就冇厘神氣，但係一講到上床，就立即精神奕奕，將女友視為洩慾工具。其實，女士們咁諗男人，真係大錯特錯喇！正如萬世師表孔子話，食色性也，性愛亦係生活基本需要。
美國俄亥俄州立大學早前進行咗一項調查，結果發現男人嘅思想唔一定全部都係性。該項調查邀請到163名女大學生，以及120名男大學生協助，要佢哋記錄低每一日，腦海諗起性事嘅次數，同時亦要記錄埋諗起食物或者休息嘅次數。結果發現，男性平均每日會諗起性事18次，而女性則有10次。之不過，男性諗起食物同休息嘅次數就夾埋有20次，比性事略高。調查報告指出，男性嘅大腦會根據身體需要而出現不同訊息，進食、休息以及性事對身體同樣重要，所以於大腦中分別出現嘅次數亦差不多，實屬正常。所以各位女士以後唔好鬧男朋友成日諗做愛喇，男人同樣會諗食飯同瞓覺o架！