全城最貴黃金罩

上個月喺長沙巿有個好盛大嘅金飾展舉行，本來金飾展成日都有，冇乜報道價值，但大會其中兩件展品，卻令唔少女人睇到嘩嘩聲，就係以純金打造嘅黃金胸圍！

皇室手藝

猶記得幾年前一套《滿城盡帶黃金甲》被評金光閃閃太浮誇，戲中鞏俐一襲金色谷胸裝，谷出深長事業線，更令觀眾側目，有口痕友笑稱鞏俐全靠穿了「黃金罩」才這麼厲害。

去年，北京有內衣公司於新加坡展出黃金胸圍，可能外界反應不錯，事隔一年後，再有內地金飾店打造出「黃金罩」。

據稱呢件「黃金罩」，係內衣公司搵嚟皇室御用打金店，請咗5個設計師，4個老工匠，以傳統手藝，將黃金編織成呢兩件內衣，由於黃金重量已有斤半重，家陣一両黃金都值萬五蚊，單單用料已經要成30萬，加上手工，售價據稱高達400萬人民幣。

劣評如潮

呢兩件「黃金罩」一曝光，各地傳媒當然爭相報道，但網友對於「黃金罩」嘅評論卻以負面居多，有人批評內衣公司打造「黃金罩」博宣傳；又話「黃金罩」咁奢侈，只適合有錢人買嚟氹女人；更有網民批評穿着「黃金罩」嘅模特兒唔夠靚，身材唔夠索。其實吃不到的葡萄是酸的呢個道理，大家都明嘅，如果真係有人送套「黃金罩」畀你，睇吓你仲會唔會咁多嘢講！