女生宿舍11點後男人止步

最近北京有間大學，於校園豎立咗個告示牌，表示晚上11點之後，嚴禁男生經過。原來呢段路，正係通往女生宿舍嘅必經之路。話說校方收到部分女生投訴，指有男生送女生返回宿舍之後，仍然企喺下面望住女生宿舍唔捨得走，令佢哋好不安喎！

怕被偷拍

呢啲癡情男生嘅舉動，惹來一啲驚死畀人望蝕嘅女生投訴，最後校方惟有下令晚上11點後，唔准男生經過此地。其實唔少網友都認為，唔畀男生送女生返宿舍，咪仲危險，而且人哋情意綿綿，只係想望住女友安全返上樓啫，何必要咁大驚小怪。

有網友就回應，以前曾有唔少女生宿舍嘅偷拍照片流出，咁夜都仲有男人企喺女生宿舍樓下，引起不安都好正常。加上有唔少女生習慣喺宿舍內只着內衣或背心短褲四圍行，若然畀樓下別有用心嘅人影咗相就唔好啦。

據聞呢個牌豎立咗1星期之後，仍然有男生照樣送女友返宿舍，但就盡量都喺夜晚11點前，就算係11點後，都會一送入宿舍就走人，唔會再企喺樓下遙望。而管理員亦好識做，只要男生自動自覺離開，都冇乜點執法，令呢個牌變得多此一舉。