催乳師谷壞奶

內地奶類產品接二連三驗出有問題，唔係有「三聚氰胺」，就話有「皮革蛋白」，最近就有調查指近七成受訪者，都唔敢再購買國產奶類製品，有初生嬰兒嘅家長，更揚言寧願餵母乳都唔想冒險。不過對於天生奶水比較少嘅婦女嚟講，點先可以谷多啲奶呢？咁就要請教催乳師喇！

濫竽充數

以前負責教母親「催乳」嘅，通常都係母嬰健康院嘅護士，後嚟陪月服務大行其道，於是抽調佢哋幫忙培訓陪月員，令合資格嘅陪月員都識得催乳技巧。由於近年傾向餵哺母乳嘅人數大幅飆升，惟不是所有媽媽都奶水充足，於是就有人開班專教催乳。

於是坊間嘅所謂催乳師，都會持有一張由培訓機構發出嘅證書，舊年就曾經有人出到成萬蚊一個月嚟請催乳師，成為城中熱話。但最近有媒體發現，有好多催乳師都係濫竽充數，全部都未受過正規訓練，而最大問題就係佢哋會亂開催乳藥，分分鐘影響母嬰健康。

出現咁嘅情況，其實同催乳服務求過於供有關，於是有部分無良嘅中介公司，就搵啲家務助理、清潔員嚟冒充。佢哋由於冇受過正規訓練，手法唔正宗，經常按摩完之後，令婦女嘅乳房又紅又腫，甚至出現乳腺炎！另外，佢哋更會亂開催乳藥或提供所謂嘅催乳食療，由於每個人嘅體質都唔同，開同一配方嘅藥單或食療催乳，亦會出問題，所以奉勸大家，請人一定要小心，寧願貴少少搵番啲有信譽保證嘅中介公司好過！