校花比賽惹爭議
早前由雜誌主辦嘅全國校花大賽已經圓滿結束，殺入總決賽嘅校花一共有16位，嚟自全國唔同嘅大專院校，經過多個回合比併，最後由就讀大連廣播電視大學嘅甄迪奪冠！
爆冷奪冠
本來選校花只係無傷大雅嘅小事，但呢個校花大賽卻惹來唔少網友批評。一來佢哋認為學生競賽應該着重學科成績而非鬥靚，加上今次比賽長達幾個月，要班大學生暫時放低書包、拋頭露面出嚟選美，無論贏輸都會影響佢哋嘅學業。
此外，亦有網友質疑今次校花比賽嘅結果，因為是次比賽嘅冠軍甄迪，於當晚嘅表現並唔突出；而且佢喺網絡票選中，一直都只係喺中游位置，最後爆大冷奪冠，自然引來多方面猜測。
有網友作出深入調查，發現甄迪本身係兼職模特兒，同主辦機構關係密切，有網友甚至推測，呢點正係佢爆冷奪冠嘅最大原因。