哈爾濱裸女香煙隨街賣

家陣啲香煙包裝，全部都係嚇人圖片，唔係魔鬼就係熏黑晒嘅內臟，絕對可以用「吾不欲觀之矣」嚟形容，但如果有人用美女嚟做包裝，大家會唔會食多兩包呢？如果用埋金髮嘅俄羅斯妹，甚至光脫脫全裸示人，係咪更加吸引呢？

公開發售

話說喺哈爾濱巿嘅中央大街，當地一啲專賣俄羅斯商品嘅小店，就有出售「俄羅斯美女香煙」。呢啲美女香煙並無特別配方，只係包裝上面全部都印上冇着衫嘅全裸美女，個個都身材出眾、玲瓏浮凸，加上搔首弄姿擺甫士，認真夠晒誘惑。

呢啲店舖同其他賣煙仔嘅商販一樣，將煙仔放喺當眼位置，於是引起正義網友嘅不滿，認為有傷風化，教壞小朋友，於是向當地傳媒舉報。記者到場走訪，發現14家同類型嘅小商店中，公開發售裸女香煙嘅竟有7間之多，佔咗一半，情況都幾嚴重！

日賣百包

當記者問到香煙貨源時，店主表示全部貨都係由俄國旅客帶過嚟轉售，不過佢哋嘅主要售賣對象，竟然係俄國遊客，等同以前香港人返內地買免稅煙一樣。但亦有內地遊客會貪得意買嚟做紀念品，據講一日都賣到成百幾包o架！

售價每包約¥20，相對內地出產嘅煙仔嚟講，算係貴價貨。但無論點都好，食煙始終危害健康，何況仲用裸女嚟做包裝，容乜易會吸引到啲對性充滿好奇嘅青少年買嚟嘗試o架，有關方面真係要做嘢喇！