長沙城管 義助鹹碟小販

最近內地嚴例執行掃黃打假行動，如果發現巿面有人售賣黃碟（色情光碟），一定要採取執法行動，由該區城管人員負責執法。近年唔少人對內地城管頗有微言，因為佢哋嘅處事手法粗暴，經常見血收場，比香港嘅小販管理隊更甚。不過，早幾日嘅一宗執法行動，就令人睇到內地城管有時都幾有人情味嘅。

人贓並獲

話說喺本月19日，於長沙開福區，就有一對夫妻，抱住初生子女，喺風雪中隨街兜售黃碟，而接到線報嘅城管人員，早就喺現場部署好，當小販向途人兜售黃碟時，隨即展開行動。

由於呢對夫妻要保護初生嘅子女，見到從四角竄出嘅城管，根本連逃走嘅意圖都冇，結果當然人贓並獲，整個過程一啲都唔血腥。但故事仲未完，返到辦事處查問，先知道呢兩夫妻來自甘肅，因為弟婦患有怪病，於是舉家變賣家當，帶同老母幼子以及病重嘅弟婦由老家走嚟長沙求醫，由於所有錢用晒去醫病，迫於無奈下惟有兜售黃碟維生。

自掏腰包 捐助小夫妻

城管聽完佢哋嘅陳述後，只充公黃碟同給予口頭警告，竟然唔使罰款，而其中一位城管更送呢對夫妻返屋企。當佢見到呢對夫妻瞓喺病床上嘅弟婦同埋凍到渾身發抖嘅母親時，呢位城管大叔竟然攞咗¥200出嚟，塞入呢對夫妻手中，叫佢哋用住先，仲表示會返去再向同袍募捐。

事件曝光後，由於一反過往城管嘅負面形象，當然大受網友嘅支持，但亦有網友懷疑係聯合傳媒合演嘅「面子工程」，但無論係真係假都好，社會多一個溫暖人心嘅故事，總好過成日都打打殺殺啦！