展現初熟魅力
我成日都覺得做人要恰如其分，細路女千祈唔好濃妝艷抹，扮到好似大人咁，而上咗年紀就唔好扮可愛，搞到好似智力有問題一樣，事關咁做絕對有礙觀瞻，有時仲令人作嘔添！
好似石川梨華咁，知道自己樣貌漸趨成熟，就唔再行美少女路線，咪正正流露出自然美囉！早幾日正係前早安少女組成員，現役歌手石川梨華嘅26歲生日，為咗慶祝，梨華就去到美國舊金山，拍攝新一本寫真集《Lucky☆》，仲標榜以素顏示人，展現自己嘅初熟魅力。
當然，梨華雖然係素顏上陣，但係美貌依然，而拍寫真嘅時候，仲去到電梯、時裝店、舞蹈學校等不同地點取景，配合性感三點式、皮製緊身衫以及芭蕾舞衫等等服裝，帶出不同美感，少咗少女時期嘅活潑，但係多一分嬌美，令人回味！