舌薄如紙 出言惡毒
如果男人條脷好似紙咁薄，原來代表心臟血管易出問題，中醫形容為心血少，呢種人做事總係提唔起勁，就算有錢跌喺佢面前，都懶得去執，要佢做決斷就更加麻煩，猶豫不決，好多時會白白錯失良機，所以事業難有進一步嘅發展。
感情方面，佢哋畀人用情唔專一嘅感覺，而且相書有話舌薄如紙，口材自然了得，心臟血管有毛病，皮膚自然白皙，所以大多數男仔都會深得異性嘅歡心，經常有大批囡囡圍喺身邊，但要佢哋從中揀一個做女朋友或者老婆，就難過登天！
由於身邊有太多囡囡，有時都會幾麻煩，所以當佢哋要撇女嘅時候，往往都會毫不留情，喺言語上狠狠咁傷害對方，令到唔少少女傷心，所以會畀人話佢哋寡情薄倖。至於性事方面，由於身體問題，佢哋唔係太過熱中，往往會令囡囡誤會彼此感情轉淡，整體上唔算係個理想情人。