法令分叉 咪亂示愛
法令代表說服能力，口才好唔好並唔重要，最重要係講完之後有冇人聽，法令生得靚，就代表你講嘅嘢多人認同，但如果法令末端出現分叉，原來代表冇人會聽你支笛，明明叫人向左走，但係啲人偏會走向右。
好多父母都會試過，即使吩咐小朋友唔好做乜乜乜，但佢哋偏偏乜都做齊，咁你就不妨留意吓自己嘅法令末端，係咪出現咗分叉線，如果係嘅，咁類似嘅情況就會繼續發生。有大師教大家講反話，希望人哋可以照番原有嘅心意去做，但效果麻麻哋。
如果法令生出分叉線時，切記千祈咪亂咁同人山盟海誓，因為往往只有反效果；更唔好隨便向愛人表白或者求婚，否則只會好夢成空。好彩呢條線只會短暫出現，過一段日子就會消失，等分叉線完全退晒後，先至好表白，咁就較易馬到功成，一擊即中。