網上賣淫集團大起底

最近成都法院將一個活躍咗三年嘅網上賣淫集團繩之於法，由主腦到司機一共17人，全部被判以組織賣淫罪，須監禁18至21個月，而當地記者十分神勇，攞到絕密資料，將呢個網上賣淫集團嘅內幕，全部公諸於世，網友自然引以為鑑。

呢個集團嘅幕後老闆係一名張姓男子，起初只活躍於成都，後來發展愈嚟愈大，勢力更擴展至上海、杭州等地，佢哋會請一批年輕男女留守成都做「盤手」，負責扯皮條，主要喺網上交友區，專向上海、杭州兩地嘅男士埋手，游說佢哋進行性交易。

冰山一角

如果網友答應進行交易，「盤手」就會致電該區嘅負責人，交帶時間地點，而負責人就會派「車手」接送宿舍內嘅囡囡前往指定地方。「車手」會照柯打先收肉金，客人畀錢後，囡囡才入房進行服務，完事後會接囡囡返回宿舍。

據資料顯示，囡囡每次出鐘，最低¥200肉金，最高則不設上限，而囡囡就可以得到肉金嘅一半，以肉金¥200為例，囡囡可分¥100，而車手和盤手各分¥20，另外區負責人亦可分得¥30，餘下嘅錢就歸大老闆，據講單係盤手，一個月就可以月入過萬。

當然，有時盤手開價唔止¥200咁平，據網友講，佢哋好多時會開¥300至¥500短敍，而過夜就收¥800至¥1,000，但一樣有大把老襯捧場。雖然家陣呢個集團已被瓦解，但據網友講只係冰山一角，仲有好多網上賣淫集團存在，有關方面要加把勁呀！