眼皮浮腫 宜玩地下情
眼皮成日都浮浮腫腫嘅男士,原來代表佢哋性格開朗,工作認真,所以相識滿天下,但全部都係酒肉朋友,冇一個可以幫到你,佢哋唔搵你笨都已經要劏雞還神,因為你嘅致命傷就係耳仔軟,朋友講多兩講,就會改變心意,任人擺布!
小記成日都同大家講,雙眼要有神,決斷力強自然會一帆風順,眼睛浮腫嘅人,眼神自然唔夠堅定,做人容易迷失方向,就算自己點樣精明,計劃好晒大小事情,但一聽朋友意見,就會變得十五十六,最後明明選擇錯誤都照做,結果搞到焦頭爛額。
情愛方面,異性緣不錯,經常會遇上娟好女子,而且追求手段高明,囡囡會輕易追到手,但只要身邊朋友說三道四,就會萌生分手念頭,如果戀情喺外地結識或者保密進行,少咗朋友危言聳聽,感情便可開花結果,婚後會係個唔錯嘅丈夫,對太太溫柔體貼。