聖誕老人半裸跑

早前冷鋒殺到，氣溫由20℃跌到落8、9℃，個天仲要一直落住毛毛雨，真係凍到我騰騰震！而根據天文台預測，聖誕節天氣亦會轉冷，咁都好，唔似過往幾年咁，聖誕節熱到爆，終於都可以過番個凍冰冰嘅聖誕節，咁先至有氣氛o架嘛！

咪以為喺咁凍天氣下，着住臃腫大褸同頸巾，會搞到唔想郁喎。好似較早前喺加拿大多倫多嘅一班男女咁，就着住泳褲同比堅尼慶祝聖誕。我所講嘅就係一年一度嘅聖誕老人慈善賽跑！

性感籌款

喺12月11日當日，多倫多嘅天氣雖然寒冷，但係一班熱心男女，男人只着紅色泳褲，女人就換上紅色比堅尼或一件頭泳裝走上街頭賽跑，而且仲頭戴聖誕帽！

至於點解佢哋會半裸出動呢？原因好簡單，正係因為佢哋有善心！呢個為病童籌款嘅慈善賽跑，今年已經係第6屆，舉行嘅目的正係為病童籌款！今年籌募得來嘅善款，據講有CA$14,000，折約HK$107,000！

據了解，今次嘅賽跑由於有好多比堅尼美女參加，令賽事極為注目，好多人仲表示下年一定會參加！所以來年一定有更多人踴躍捐款，肯定可以令善款數字創出新高啫。咁有意義，我都想參加埋一份呀！