掃黃難治本

最近內地網絡有篇文章，被不停轉貼，唔少網友更大表支持，其實文章內容十分簡單，就係內地掃黃嘅成效。近年全國各大城巿都高調進行掃黃，有唔少單位仲安排埋電視台即場直播，令行動全國皆知，表面好似好成功，但網民就唔係咁諗！

大事批評

網絡上有一篇冇署名嘅文章，就批評家陣掃黃，似做騷多過執法，有時為求畫面逼真，好多時都玩破門而入，以記者拍到光豬男女為目的，觀眾睇到當然夠晒震撼，但之後大眾更關心嘅係，究竟行動中真實檢控咗幾多人？檢控咗幾多間夜場？

文章仲講到一日不拘捕幕後黑手，呢啲夜場仍然會死灰復燃。而且拘捕呢啲搞手，仲有一個好處，就係可以順藤摸瓜，抽出幕後嘅更大黑手—就係一直包庇佢哋嘅貪官或者違法單位。

幕後黑手

文章狠狠批評，自然深得網友嘅支持。但據一啲知情嘅網民回應，叫大家咪咁天真，要捉呢批幕後嘅夜場老闆，根本唔係一件容易嘅事，如果你仲想順藤摸瓜捉埋幕後包庇者，簡直就係天方夜譚，就算係夜店嘅工作人員，都未必知道夜場嘅真正經營者係邊個，更何況背後嘅人。

所以要根治黃色事業，真係一件十分困難嘅事，反而有網友就話應該學台灣咁，倡議娼妓無罪化，可能會更有效果。少咗保護傘呢一層剝削，得益嘅就係買賣雙方，囡囡可以搵多啲，客人又有更好嘅服務同保障，如果係咁相信唔少網友都會舉腳贊成。