喪男High爆共舞
喪男High爆共舞
做女明星有時真係幾麻煩,魅力唔夠又怕冇Fans,魅力太勁又會驚啲瘋狂Fans上門騷擾。娛樂新聞呢幾年不時都有瘋狂Fans趁女星於台上表演嘅時候,衝上台索吻嘅報道,最近仲有前餅女懷疑被人偷拍添!
事實上,作為一個觀眾,見到咁索嘅女仔於台上表演,眼神同動作都咁具挑逗意味,又真係好難忍嘅!較早前於深圳舉行嘅第十二屆中國國際高新技術成果交易會(簡稱高交會),又出現瘋狂男觀眾上台搞搞震嘅插曲喇!
衝上舞台
當日,正係高交會最後一日,為咗隆重其事,大會就特別安排場館內上演鋼管舞,將眼福帶畀一班入場嘉賓!當時,一位體態撩人嘅鋼管舞女郎正大跳誘人舞步,令現場氣氛火辣辣!突然,一名作板仔打扮嘅男人,衝上台想親近一下鋼管舞女郎!女郎梗係嚇咗一驚、冇晒表情啦,而呢位喪男見阿妹冇晒反應,於是就自己攬住支鋼管跳起舞嚟,表情仲不知幾High添!見到咁嘅情況,現場保安梗係拿拿聲上台捉住喪男啦!但係喪男動作靈活,多番避過保安嘅擒拿手,仲走落台繼續跳舞挑釁班保安人員,真係喪過喪彪!最後,喪男有冇被捉住就冇消息公布,不過我諗喪男都係一時技癢嘅啫!