性感X-Men 忍者震波女

講到對世界動漫界影響力最大，除咗日本漫畫外，就係美國漫畫。例如《蝙蝠俠》、《蜘蛛俠》、《變形俠醫》等，當然不得不提超人氣漫畫《X-Men》啦！今次介紹嘅呢個兩手持日本刀嘅靚女，就係《X-Men》漫畫中嘅其中一個女角色─震波女（原名Psylocke，又名心靈忍者）嘞！

凸顯女性體態美

其實《X-Men》漫畫系列相當多，除了有我哋耳熟能詳，曾經喺《X-Men》電影中出現過嘅角色外，仲有好多未喺銀幕前亮相過嘅，而呢位震波女就係其中之一。

故事講述嚟自英國嘅金髮美女震波女，本身係擁有預知及傳心術嘅異能人。後嚟因為喺一次復活儀式中出咗問題，進入一個日本少女嘅身體，從此以日本人身份出現，並喺日本嘅暗殺組織學習忍術。由於震波女樣靚身材正，加上戰鬥力極高，故此深受《X-Men》迷嘅愛戴。

講番呢個首辦模型，雖然樣子同漫畫中嘅震波女有些少出入，但少咗份西洋味嘅佢，卻有種東方女性韻味，更加脗合漫畫中嘅日本女性身份！除此之外，模型原型師更故意減少原著震波女嘅肌肉紋理，從而凸顯女性體態美。配合埋一件性感高衩戰衣，令渾圓美股更覺養眼，加埋兩把型爆東洋刀，搖身一變成為性感女忍者。難怪唔少《X-Men》迷都希望，Marvel能夠繼續推出有關震波女嘅外傳啦！

全高： 約200mm

售價： ¥6,510（約HK$600）

預定發售日： 2011年5月