眉壓雙目 忘恩負義
眉壓雙目 忘恩負義
眉同眼之間嘅距離好窄，相學叫做眉壓雙目，無論男女都係唔好，特別係男性，除咗表示佢哋唔黐家，冇乜家庭觀念之外，佢哋仲成日外出遊蕩，所以一定染有不良嗜好。相書話呢種人會活喺淫亂之中，每當床頭金盡，就會惡向膽邊生。
而靠惡靠發爛渣都滿足唔到佢哋嘅需要時，佢哋就會做出更得人驚嘅舉動：例如打家劫舍、殺人放火，所以古時稱之為「凶相」或者「敗相」，即係一望就知救唔番。而隨着社會進步，佢哋少咗殺人放火，但多咗用偷呃拐騙嘅伎倆嚟滿足自己。
情愛方面，佢哋為求目的會不擇手段，追求時，會讓囡囡覺得自己對佢如珠如寶，但一得手之後，就會棄如草芥，所以做佢哋嘅老婆同情人都幾辛苦。除非你有一技之長，或者背景夠厚，先壓得住佢哋，否則感情一般不出3年就會玩完。