貨車司機 睇鹹碟提神

記得有一段時期，好多老友北上搵女，都當正自己嘅所作所為光明正大，無論喺車上定喺酒樓，都不停高談闊論，驚死冇人知，但近年經過有關方面大力掃蕩，一眾嫖客都略有收斂。

除咗北上搵女外，睇「黃片」（鹹片）嘅情況亦都一樣，好多人都覺得無關重要，但原來一樣係違法行為，畀公安發現一樣要罰款，甚至踎監添！

車上傳出呻吟聲

話說前幾日喺浙江甬金高速公路旁，有架大型貨車停咗埋一邊，畀巡邏嘅交警發現。巡警擔心車輛出咗問題，於是停車上前查看，當巡警一落車，便隱若聽到車上傳來女性呻吟聲，而且十分淒厲，巡警擔心車上有風化案發生，於是加快腳步衝向司機位。當巡警拉開車門時一望，發現只有一名安徽籍男司機，不見任何女性，當巡警再細心觀察時，才知道司機身後藏咗部小型DVD播放機，旁邊仲有三隻色情光碟，而剛才傳出嘅呻吟聲，就係由播放機傳出，難怪咁鬼逼真。巡警審問司機，做乜停車喺度睇鹹片？司機嘅解釋都幾妙，佢話因為感覺疲累，於是停車睇睇鹹碟，希望可以提提神，巡警當然唔相信，仲拉咗佢返交警總部。最後司機簽咗悔過書認錯，罰咗兩百蚊人仔了事。估唔到睇鹹片都會惹上官非，惟有嘆句唔好彩啦！