成人版EVA明日香

有人話《新世紀福音戰士》（又稱《EVA》），係繼70年代《高達》同80年代嘅《超時空要塞》後，日本動畫嘅第三次衝擊！姑勿論事實係咪咁，但足見呢部作品喺動漫迷心目中嘅地位，而今次介紹嘅呢個模型，就係故事中嘅女主角之一明日香嘞！

如果閣下係動漫迷嘅話，呢部《新世紀福音戰士》嘅內容真係熟到爆。故事講述自從「第二次衝擊」，導致世界大戰後，聯合國就喺日本箱根成立人工進化研究所，致力研製保護地球嘅人工生物機械EVA外，仲希望能夠透過人類補完計劃，等人類可以實現進化。除咗「第二次衝擊」同「人類補完計劃」呢啲術語外，「使徒」、「LCL之海」、「AT力牆」等，亦成為一時嘅動漫潮語，當中嘅女主角凌波麗同明日香，更成為動漫迷嘅熱捧對象。

睇番今次介紹嘅呢個模型，可能大家會發覺同平時見開嘅明日香有啲唔同，事關佢從一個金髮少女，搖身一變成為上圍激凸嘅成熟女性。據原型師指，係希望能夠將一個成人版嘅明日香，展現喺動漫迷眼前，重點在於突出明日香嘅女人味。唔知呢種轉變，有冇帶畀大家新鮮感呢？