生仔唔結婚

最近一見到孫公，小弟就怒火中燒！除咗因為直資學校亂咁使我哋納稅人嘅錢之外，孫公又強迫學校縮班，搞到好多名校未來應該都無可避免要接受減少收生嘅命運！

咪以為呢啲嘢同我冇關，因為我本身都諗住谷阿仔阿女讀名校，家陣名校要減少收生，到時阿仔阿女點出人頭地？點養我呀？孫公又話縮班完全係同出生率下降有關，我就話同佢哋政府有關就真！點解？政府嘅經濟政策搞極都搞唔好，令大家生計縮水，自然唔敢生仔，出生率咪一年低過一年囉！不過，話時話，外國又冇呢個問題喎！

美國密切根大學早前做過一項調查，發現有28%嘅受訪女性接受做未婚媽媽，因為佢哋同我哋香港人有同樣想法，就係要有能力辦一個正式婚禮，以及儲到一筆錢先會結婚，但係就唔介意先同愛人生BB嚟維繫感情。因為呢種接受生仔而唔結婚嘅諗法，令當地出生率冇明顯下降！

如果有機會，我覺得應該將呢份報告公開一下，一來等女性唔好成日催我哋男人結婚，二來等大家唔使日捱夜捱，儲夠珊珊講嘅四百萬先夠膽生仔，咁咪可以催谷出生率囉！